إجمالي مرات مشاهدة الصفحة

الاثنين، 27 ديسمبر 2010

(13 )نــيـــــران الغــضب..





وتقدم كتير يوم الاختيار  عادل وحنين ومحسن هما اللي هايختاروا البطل .. 

وكان كريم  من بين المتقدمين للاختبار.. 

وتقدم كريم للإختبار وكان مشهد صغير جدا بينه وبين حنين .. 
 وأثناء المشهد اللي كان كريم بارع فيه اوي وكأنه كان بيستناه من زمان .. جت عيونه بعيون حنين لتاخادها لعالم بعيد ..

تحاول تفتكر شافته فين ..همس لها بكلمه واحدة
(النضارة)

فافتكرت

الحادثة وفاقت من شرودها على صوت عادل :
ستوووب  إنت كويس  .. الباقى يمشي!

وأصبح كريم هو اللي هايبقى البطل مع حنين! وكانت مفاجئه بالنسبة لكريم انه وقع عليه الاختيار وكان سبب سعادته الوحيد مش نجاحة بالاختبار لا... 

شيء ما بقلب كريم ...
وكان دوره في الفيلم حبيبها ..
وبعد تدريب لكريم وعمل بروفات بدأت تصوير المشاهد وكان
يوسف فرحان جدا لصاحبة وكان دايما بيكون معاه بيتفرج!


وكان  اول مشهد لحنين مع كريم .. مشهد بفستان كلاسيكي روز وتسريحة رقيقة.. وفي المشهد دا.. 

بتكون في سهرة وبتخانق مع جوزها وبتخرج متعصبه .. تتصدم بكريم وهو داخل من الباب .. وبتتلاقى عيونهم لأول مرة في الفيلم ..
؟

كريم عيونه مش بتفارق حنين!

(جميلة أوي بفستانها ورقتها وجمالها.. واثناء التصوير .. كانت حنين بطبيعتها اما كريم وكأن المشهد حقيقة ... و)

وخلص تصوير اول مشهد وكلهم مشيوا............


والمشكلة ان حنين كانت مستغربة من نظرات كريم  و بتسأل نفسها

(  إيه السر بعيونه.. زي ما تكون ب تحكي ليها حاجات كتير ..أو...........

ياترى هتضل تحكي لها كتير..؟

وبتقولها ايه ..؟
(اتفرجوا على الكليب واسمعوه لان منه هتفهمه اللى جاى
ضرورى)


وفي يوم واجهتها حنين .. 

اللي كانت وقتها مش فاهمة بيحصل ايه ..
وليه هما في المكان دا .. طب لو دا تصوير ..فين الكاميرات..
وفين عادل ..أه عادل .. تكشر ملامحها لما تفتكرة .. تشعر بايد بتلمس ايدها وحنين بيرعش كيانها

كريم: قد كدا مش حساني .. ولا حاسة النار اللي بتحرقي بقربك
بتهربي دايما من نظراتي .. 

عارف انه مش من حقي لكن .. 

قوليلي أعمل ايه ..

تعالي ..
(واخدها من ايديها ويجري .. وهي بتجرى غصب عنها من جذبه ليها ودخلت معاه غرفة قديمه .. 

اتفاجئت من منظر الغرفة  .. ونظرت بدهشه.. 

كل جدران الغرفة صورها من فيلمها الأول .. وكل صورة ماضي عليها كريم بدمة 

بحــــــــــبك .. 

ونظرت ليه  بألم .. والدموع بعيونها

وكانها بتساله كل دا .. امته وفين..وليه .. 

ومستنكرة حبه ليها ...
.

كريم:من قبل ماقابلك كنت بشوفك باحلامي .. 
قدري .. 
عمري .. 

تمنيت اكون النبض بداخل شريانك .. 

الشهد بشفاهك .. الثرى بأقدامك ..

المياه بكاسك .. 

النيران بإحساسك ..

وتنساب دموع حنين .. وبداخلها .. شيء مبهم .. 

وترفع عيونها ببطء لتلاقي عينيه التي هي عنوان للشجن والحنين ..فترى خلفة ..

حازم بركن خافت الضوء من الغرفة..
وقد انسابت دموعه ايضا ونظر بحزن  الى الارض .. 
مما جعلها تصرخ ...
وتصرخ ألماً فلم تتحمل ان تراه هكذا...


وتصحى حنين مخضوضة على صوت صرختها وهي بتنهج جامد وصدرها طالع نازل ..
من اثر الحلم اللي كاد ان يكون حقيقة وكانت دموع حازم كالنيران التى تنهش صدرها الصغير

حنين تبكي وتبكي : حازم حبيبي لا يمكن ابدا حد ياخد مكانك ياعمري .. وقررت حنين ..؟

ماتديش ..فرصة ابدا لكريم !


وتمر الأيام .. وتصوير وشغل .. ويوم بعد يوم يكبر حمل حنين ... 


وبتعامل كريم بفتور وتقصر جامد في الكلام معاه .. وكان كريم مكتفي جدا بإنه بيشوفها وبيمثل قدمها ..

واحيانا كريم ماكنش بيهتم بفتورها .. وكان بيعتقد انه بسبب انها سيدة متزوجة .. لكن كان في حاجه شاغله باله اوى .. 

ومخلياه دايما شارد؟

وفي يوم بعد الشغل خرج من الإستديو ومعاه يوسف!كريم طول الطريق ساكت ويوسف يرغي كالعادة!

يوسف: كريم سرحان في إيه ؟ياخي عبرني بكلمة ولاّ إنت خلاص هاتكبر علينا
كريم يبص له بعتب ويتنهد:  أنا مش مرتاح!

يوسف: مالك عيان؟

كريم: لا .. بس لازم أتكلم مع حنين

يوسف يضحك: حنين مرة واحده!هو عشان هاتمثل قدامها يبقى خلاص! فووق يابا.. إنت فين وهي فين ؟مش تنسى نفسك ياكريم!

كريم:  إنت غبي؟إنت فهمت إيه؟ أنا بتكلم عن الشغل مش مرتاح! أينعم أنا ممثل مبتدئ لكن القصة مريبة

يوسف:  ليه ؟ القصة عن إيه؟

كريم سرحان:  واحد متجوز واحده غنية وعايزها تموت عشان يتجوز عشيقته!! وبيحبها البطل وينقذها ويتجوزها

يوسف:  أنا شايف إنه سيناريو عادي جدا وهابط كمان! إتعمل قبل كدا أبيض واسود!ويمكن المخرج عايزة يسقط (ويضحك أوي)!

كريم:  إنت بتضحك

يوسف: أمال هاعمل إيه ؟أصلا حنين دي مراته وأكيد مش هيعمل لها فيلم هابط ..

بالعكس لازم يشهرها أكتر! وأكيد له وجهة نظر تانيه! وانت بتقول باقي السيناريو كويس!

وبعدين إنت يابن إمبارح هاتفهم أكتر منه, إنت ها تصدق نفسك وتعيش الدور ولاّ إيه!وربنا يستر ميكنش مُختل و عايزها تفشل وجاب وجه جديد عشان كدا!

(ويضحك)

كريم: في حاجه غريبة  أوي! عادل جايب واحده وجه جديد! إتعرفت عليها اسمها سما!
سمعته بيقولها لازم تحفظي الدور كويس لأن حنين مش هتكمله
وإنتِ البطلة البديلة! الكلام دا معناه إيه بأه ؟

شكل حنين ماتعرفش حاجه عن البنت دي! لازم أقابل حنين بره  البلاتوه وبعيد عن الكَاست وأتكلم معاها!!


يوسف بجديه: اكيد عشان الحمل يا أستاذ .. ممكن تكون قربت تولد .. ولما تولد مين هيعمل الدور..ماتكبرش المسائل وخليك في حالك .

كلام يوسف ماأقنعش كريم ..وتاني يوم راح  عند بيت حنين وفضل واقف قدام  العمارة! وشاف عادل نازل من فوق وركب عربيتة بسرعة ومشي! وكان كريم جايب معاه السيناريو تحسباً لأي مفاجئة! وفضل كريم مستني حنين تنزل..

ويمر الوقت! وآخر ما زهق قرر يطلع لها.. ويقولها إنه محتاج يتكلم معاها ضروري وينزل يستناها تحت لحد ماتنزل, ويروحوا أي مكان يتكلموا فيه! دا  كان تفكير كريم ............

وراح على البواب وسأله عن شقة الممثلة حنين وعادل بيه وطلع معاه البواب وشاور على  الشقة .. وكريم طلب من البواب يستنى ورن جرس الباب و..........

البواب:  يمكن الست مش موجودة؟

كريم بتلقائية: لا موجودة! أنا واقف من بدري قدام العمارة محدش نزل

البواب يبص له باستغراب ..!

كريم توتر:  قصدي .................! هم مش عندهم شغالة

البواب:  هو إنت مين ؟

كريم بعصبية عشان يداري موقفة:  أنا زميل مدام حنين ولينا شغل مع بعض وعندي معاد معاها.. إتفضل رد ..عندهم شغالة

البواب باضطراب: أيوة يا بيه! لكن كل شويه يدوها أجازه

كريم: يخبط تاني والبواب يرن الجرس! لكن باب الشقة اللي جنبهم يتفتح وتخرج الشغالة تكلم البواب

حسنيه:  عم عبدوا..  يظهر مافيش حد بس ريحة الغاز جامدة أوي من المطبخ

عبده:غاز! لتكون المواسير سربت أنا هتصل بعادل بيه

كريم ل حسنيه:  هو المطبخ  فين ؟

حسنيه:  تعالى إتفضل (ودخل كريم وكان شباك المطبخ قريب من شباك مطبخ حنين وفعلاً ريحة الغاز تخنق وسمعوا كحة جايه من جوه! جري كريم على الباب ويحاول يفتحه مش قادر!

دخل مطبخ حسنيه تاني وفتح الشباك وحسنيه تصرخ: إنت هتعمل إيه ؟ إنت مجنون داحنا في 13يعني لو وقعت هاتتنتف ميت حتة

كريم طلع على الرخامة وطلع على الشباك:  حسنيه هاتي أي حاجة أكسر الشباك

 (وبص لعبدوا:  بلغ البوليس!!  عبده بذهول:  بوليس

كريم بعصبيه لعبدوا: أيوة بوليس اطلب النجدة أجبلك كتالوج عشان تفهم!)

 وجابت حسنيه خشبة طويلة وخدها كريم وكانت المسافة بين الشباكين مش كبيرة  (منور صغير )  وكسر كريم زجاج الشباك! ووقعت منه الخشبة تحت نزلت اتسكرت ..

كريم يبلع ريقة ويبص لشباك حنين .. و!
وعدي من على المواسير من غير مايبص  لتحت

 (وكان عبدوا بلغ البوليس وجري نادى البوابين ويحاولوا يكسروا الباب )

 ونجح كريم وعدى بصعوبة من فتحة الشباك وتعور جسمه من بواقي  الزجاج المتكسر!

وقميصه تقطع ودخل بسرعة والغاز شديد أوي! 
يدور على حنين.. 

ووصل لغرفتها وكانت فاقده الوعي ! شالها و بنفس اللحظة فتحوا فيها البوابين الباب وصوت عربية النجدة تحت وكان كريم طلع على باب غرفتها!

والشقة كلها ضلمه  من الستاير المقفولة! وبحركة لا إيراديه  عبده ها يضغط على مفتاح النور لإنهم داخلين من النور للضلمه مش شايف حاجة!

وكريم شافه قاله:  لاءااااااااااا ورجع بحركة تلقائية للخلف

 (لأن المكان كله غاز.. وفي الحاله دي ممنوع استعمال الكهربا حتى لو هنولع لمبه .. تحسبا لأى شرر ..يعمل حريق )

(وبنفس اللحظة ضغط عبده المفتاح وحصل انفجار مكتوم واشتباك النيران واختلاطها بالغاز وعلى أثره طار عبده واللي جنبه على السلم! وكريم ..حنين مخنوقة ومغمي عليها بين إيديه! والنيران انتشرت أسرع من البرق و.....
؟
؟
؟
تابعوني


هناك 28 تعليقًا:

الحــب الجميـــل يقول...

لا بجد انتى هايله
عايزة اقولك انى حاسه انى عيشت الاحداث
ما شاء الله
الحلقه المرة دى احدثها رهيبه
الغضب احمق فعلا وبيعمى ونيرانه بتعلى وتعلى
وعادل وصل لمرحله صعبه فى القضاء على حنين
والبطل الجديد وصل فى الوقت المناسب
جميله جدااا يا اسماء
روعه بجد

تسلم ايديك وتفكيرك

*****

شيرين سامي يقول...

حلقه رائعه و مشوقه جداً ما شاء الله عليكي رومانسيه و اثاره مفيش بعد كده
تحياتي الشديده و تقديري لأجمل كاتبه

Mona Abo - Elso3od يقول...

ايه ده خلصت بسرعة :(((
بجد ما حسيتش بالوقت هاقراها تاني :)
هافضل كل مرة اقول نفس الكلام عيشت الاحداث وشوفتها قدامي و حسيت بيها اوي
عادل ده بقي جاب اخره معايا يا ريت تريحينا منه

يسلم احساسك العالي الراقي

شهر زاد يقول...

حرام عليك يا أسماء
كده تخلينا في النص منا ماصدقت نشرت حلقة كنت قايمة أنام ولما لقيت البوست قعدت بسرعة وكلي لهفة واشتياق لحنين
بس معلش سخنيها يا عزيزتي ولا يهمك أنا وراك وراك والزمن طويل ولو عملتيها مسلسل تركي مش حمل ولا أكل
من غير مجاملة ولا تزويق انت روعه في سردك وفي العقد الثانوية الي بتتفرع عن العقدة الأصلية
باين ان القصة حتاخد من سنة 2010 و2011
يسلم ابداعك تحياتي

Ms Venus يقول...

رائعة يا اسماء


اسفة ان دى اول مرة اتابعك هنا

اكيد انا خسرت كتير

بس هتابعك دايما ان شاء الله


دمتِ موهوبة ومبدعة

حاجات جوايا يقول...

لو قلت رائعة وممتعة وهايلة
يبقى مقلتش جديد
الحلقة جميلة اوى
عجبانى قصة الحب الجديدة اللى بتتسلل بين السطور
بحب انا الحب اللى بيتولد على عكس الظروف ده هههه
كلى لهفة لمتابعة الحلقة الجديدة
متتأخريش علينا يا سمسم :)
تحياتى لكى حبيبتى

re7ab.sale7 يقول...

يا خبر
اممممممممممم
جميييييييييل جدا جدا جدا بجد
مستنية الباقي
متغيبيش بقي

carmen يقول...

حلقة روعة حبيبتي بجد تسلم ايدك
الاحداث بدأت تاخد منحني صعب
في انتظار الحلقة الجاية ماتتأخريش غلينا
تحياتي

شمس النهار يقول...

كده!!!!
طاااااايب

:)))))

ماتغبيش بالباقي بقا

هايلة يااسماء

كل سنه وانتي طيبه
ومحققه كل احلامك

كلمات من نور يقول...

الله عالأحداث المتلاحقه بصور حقيقي بعيشها لحظه بلحظه

متابعه للنهاية إن شاء الله ويارب تكون دي نهاية عادل بقى

Dr/ walaa salah يقول...

حلقه جميله اوي

ربنا يستر على حنين والجنين

بجد حنين عشان طيبه ربنا بينجيها من اي كارثه

اما عادل ده منه لله

مش عارفه هو طلعلنا منين

بقولك ايه يا اسماء

تاخدي كام وتموتيه الحلقه الجايه ^-^

في إنتظارك يا حبيبتي

eng_semsem يقول...

لا احنا كده ممكن نتحرق معاهم لحد ماتنزل الحلقه اللي جايه
امرنا لله نستنى الحلقه اللي جايه
كل سنه وانت طيبه

أم هريرة (lolocat) يقول...

السلام عليكم اختى البيبة

مش عارفة المرة دى حسيت كده بشوية حماس زايد والاحداث اخدت شكل سريع شوية

الجميل فى الامر انك ماشاء الله بتعرضى الاحداث كأنك عايشة جواها

جميلة حبيبتى ربنا يوفقك وفى انتظار
البوست القادم

مودتى لك وارق تخية لارق اسماء

وداد يقول...

ووواااااااوووووو

ايه التشويق والإثارة دي

الجزء دا عجبني جدا خصوصا انه رومانسي

تصدقي حسيت بالخنقة وانا بقرأ الجزء بتاع كريم وهو بيحاول ينقذ حنين

بجد انتي رائعة يا سمسمة

واسفة على التأخير لأني كنت تعبانة شوية

يلا عندك واجب تدويني روحي مدونتي بسرعة

وخدي الواجب واعمليه

اسماء عبدالعزيز يقول...

حبيبة قلبي الحب الجميل
كل سنه وانت طيبه ياقمرى
عام سعيد عليكم ان شاء الله
اشكرك على المتابعة وعلى كلامك الراقي واعتذر عن التاخير
يسلملى قلبك الطيب
دمت بكل الحب

اسماء عبدالعزيز يقول...

حبيبة قلبي الجميلة شرين سامى
وحشتيني يسكر
كا عام وانت بخير
سعيده بمتابعتك جدا وبانها نالت اعجابك ياقمرى
دمت بحب

اسماء عبدالعزيز يقول...

حبيبة قلبي الرقيقة منى ابوالسعود
كل سنه وانت بخير ياقلبي
اشكرك على المتابعه وانها نالت اعجابك ياقمرى
للاسف عادل معانا لسه
مضطره تستحمليه شويه وتحقدى عليه شويتين
ههههههههه
دمت بكل الحب والود

اسماء عبدالعزيز يقول...

شهر زاد الجميلة وحشتينى ياقمرى
بجد تعليقك اخجلنى ولكنه ينم عن احساسك الراقي وقلبك الجميل
تسلميلي ياقلبي وتسلم متابعتك وانا نزلت الحلقه بسرعة اهو عشان ماتزعليش
انا اسفا انى اتاخرت عليكم في الرد
دمت بكل الحب

اسماء عبدالعزيز يقول...

حبيبتي الجميلة ماى فينوس بالطبع انا التى كسبت الكثير بمرورك ووجودك بصفحتى المتواضعه
اتمنى ان ينال قلمى اعجابك دائما
كل عام وانت بخير
كونى بكل الحب

اسماء عبدالعزيز يقول...

رحاب صالح الجميلة
وحشتينى يسكر
كل عام وانت بخير
مستنيه رايك بالحلقه الجديده
دمت بحب

اسماء عبدالعزيز يقول...

حبيبة قلبي الشاعرة الرقيقة كارمن
كل عام وانت بخير
يسلملى مرورك وكلامك الراقي ياقلبي واتمنى الحلقه الجديده تنال اعجابك
دمت بكل الحب

اسماء عبدالعزيز يقول...

حبيبة قلبي الجميلة حاجات جوايا
بجد مرورك الاروع
تسلميلي ياعمرى على متابعتك وكلامك الراقي واتمنى اعرف رايك بالحلقه الجديده عام سعيد ان شاء الله عليكي

اسماء عبدالعزيز يقول...

حبيبة قلبي شمس النهار
ونور الكون الجميلة
يسعدنى انها نالت اعجابك واتمنى الباقى ايضا ينال اعجابك
كل عام وانت بكل الخير حبيبتي
دمت بحب

اسماء عبدالعزيز يقول...

كلمات من نور الرقيقة
كل عام وانت بخير حبيبتي
يسعدنى مرورك المميز ومتابعتك دمت بكل الحب حبيبتي
كونى بخير

للاسف عادل لسه معانا شويه لكن ياترى مين اللى هيتقتل الحلقه الجايه
ههههههههههههه
كونى بخير

اسماء عبدالعزيز يقول...

حبيبة قلبي الرقيقة
د ولاء وحشتيني ياقمرى
طبعا للاسف مش هاقدر اموته دلوقتى لأن عادل في سر بحياته بيوضح لينا ليه اخلاقه بالشكل دا
فلازم تستحمليه لانه لسه معانا شويه
دمت بكل الحب جميلتي
كل عام وانت بخير

اسماء عبدالعزيز يقول...

اخى الكريم eng_semsem
اشكرك كثيرا على المرور الكريم وكلامكم الراقي
كل عام وانت بخير

اسماء عبدالعزيز يقول...

حبيبة قلبي الرقيقة
ام هريرة
صباح الورد كل عام وانت بخير حبيبتي
يسلملى مرورك ومتابعتك واطراؤك الذي اخجلنى
دامت السعاده لقلبك
اتمنى دائما ان ينال قلمى اعجابك
دمت بحب

اسماء عبدالعزيز يقول...

حبيبة قلبي الجميلة وداد
وحشتيني ياقمرى وكل سنه وانت طيبه يسكر
تسلمي على التدبيسه الحلوه بس بعد الحلقه الجايه ان شاء الله
سعيده ان الحلقه دى نالت اعجابك ياقمرى
واتمنى دا للنهايه
شكرا على كلامك الراقي
كونى بخير حبيبتي