إجمالي مرات مشاهدة الصفحة

الأربعاء، 24 نوفمبر 2010

( 6 ) انـتــظـــــــــــار...

 انـتـظــــــار....




عادل: مين البنت دي؟


العامل: ماعرفهاش! كانت ......................................(وحكى له)

عادل:  روح وراها بسرعة ناديها!

وفعلا راح العامل ورا حنين ولكن لقاها اختفت! رجع بسرعة لعادل

عادل: لو البنت دي جت تاني خليها تستناني.. وناديني بسرعة ولو حازم موجود خليه يشوفها!
( وصل حازم ب عربيتة يركن وينزل!)

حازم لعادل:  صباح الخير

عادل:  فاتك نص عمرك! كان في بنت هنا من ثواني بس.. هي دي اللي ب تدور عليها! مافيش غيرها تنفع للدور دا

حازم بلا مبالاة:   مين دي؟

عادل:  ماعرفش

حازم بسخرية:  نعم! ماتعرفش! أمال إزاي عمال تقول هي دي وماعرفش إيه! جرى إيه يا عادل ما تركز شويه.. أنا دماغي مش رايقة!

عادل بضيق:  الحكاية مش مستاهله كل دا! دي بنت من المنطقة .. و كانت واقفة مع العامل بتكلمه, ولما شفتها قولت للعامل يناديها كانت مشيت ولا عرفنا اسمها ولا مكانها

حازم:  مش مهم البنات كتير! (عادل مستغرب من موود حازم..  وسابه وخرج!)

في الوقت دا كانت حنين وصلت لمحل ملابس للجنسين اسمه توتي وصاحبة المحل وافقت تشغلها وراحت تقول لجدتها و تتغدى ومن بكرة تبتدي الشغل
أما الست مروه مش مبطله رغي في الموبيل.. وكانت بتكلم واحد جديد.. تتعرف علية

مروه: الو إزيك

مجدي:  مين معايا ؟

مروه: واحده ماتعرفهاش

مجدي: وعايزة إيه ياللي ماعرفهاش؟

مروه: أنا زهقانة أوي ومحتاجة حد أتكلم معاه

مجدي: إنتِ مجوزه ؟

مروه:  لا أرملة

مجدي:  أنا آسف!

مروه: ماتشغلش بالك

مجدي: من زمان ؟

مروه:  من سنه.. سابني وأنا حامل في بنتي ياسمين!

مجدي:  إنتِ عندك بنت؟

مروه: أه! عندها سنه

مجدي:  ربنا يخلي بس ممكن تقوليلي جبتِ رقمي منين؟

مروه:  أنا ضربته بالصدفة لو مش مصدق خلاص هقفل وكأن شيء لم يكن!

مجدي: لاااا عادي! ممكن نتقابل طيب عشان نتعرف اكتر؟

مروه: لااا.. أخاف على سمعتي! أنا ست محترمة ووحيدة أوي خالص!

مجدي: عندك كام سنه...........(وفضلت المكالمة ساعة أو اكتر وتعرفوا على بعض وكان مجدي 25سنه ومش متجوز و كان إنسان خام نوعا ما! وتواعدوا يتقابلوا يوم الجمعة!)


أما حنين مشغولة جدا وفرحانة إنها هاتتفرج على الممثلين وتشوفهم من قريب!  وقررت الصبح بدري قبل ماتروح شغلها تروح مكان التصوير تاني,
وتدور على مكان تتفرج منه ومحدش يشوفها!
 وعدى اليوم وحنين فرحانة.. وحكت لجدتها اللي استغربت أوي وقالت سبحان مُغير الأحوال! الصبح كنتِ مضايقة جدا.. ودلوقتي طايرة من الفرح!  ربنا يسعدك...
والصبح راحت حنين لمروة

حنين:  بت يا مروة  في فيلم ها يتصور هنا وهانشوف الممثلات والممثلين على الطبيعة

مروة: والنبي سيبيني في الفليم اللي أنا فيه! جايالي من النجمة تقوليلي فيلم! إنتِ هبله ولاّ إيه ؟

حنين استغربت أوي من ردها:  في إيه مالك ؟ مروة في إيه؟ شكلك ناوية على مصيبة

مروه:  يادي النيلة.. درس مواعظ على الصبح! اسمعي أنا عايزاكِ تيجي معايا الكوافير

حنين بدهشة:  كوافير! ليه محمد جاي؟

مروه بقرف:  محمد إيه ؟  أنا جبت سيرت محمد؟

حنين: أمال هتروحي الكوافير ليه؟

مروه: هاعمل نيو لوك جامد أوي! عشان يوم الجمعة

حنين: اشمعنى الجمعة

مروه بشرود: ها تجوز(نزعها من شرودها صوت  حنين وبتهكم:  تت إيه ؟ إنتِ إجننتي ؟هو محمد طلقك؟

مروه:  بهزر معاكِ ياشيخه! بس أنا قرفانة من شكلي كدا.. وعايزة أبقى حلوه زيك

حنين بسخرية:  الوحش وحش لو ....  كل يوم!

مروه:  عرفنا ياختي! هتيجي معايا ولاّ؟

حنين بتنهيدا وابتسامه:  لا أنا هاروح أتفرج
( سابتها وخرجت وراحت على مكان التصوير لقت عمال كتير.. فمشيت عشان مش تتأخر على شغلها و مخدتش بالها إن العامل شافها! المهم راحت المحل وفتحت وبدأت تحط لمساتها على الفتارين الداخلية وتلمع و تظبط

وبعد الضهر جه عادل وهو منفعل جدا ومعترض على البدء بتصوير المشاهد قبل ما يلاقوا البطلة الرئيسية! قابلة العامل: لو سمحت يا أستاذ عادل

عادل:  امشي من وشي دلوقتي أنا مش ناقصك

حازم دخل ورا عادل ومُنفعل هو كمان ويقول لعادل: المفروض إنت  المخرج التنفيذي  يعني كلامي يتنفذ!

عادل بعصبية: ماتنساش إننا أصحاب.. ولو هتنسى دا يا حازم وتعاملني بعجرفة أنا ها نسحب! أنا فاهم شغلي كويس أوي

حازم:  لو سمحت يا عادل الشغل مالوش دعوة باللي بينا! افهمني لازم نبتدي التصوير تأخرنا جدا! أصلا في مشاهد كتير من غير الحسناء! وأي واحدة وجه جديد ممكن تنفع لو مالقناش البنت دي

العامل: لو سمحت يا أستاذ عادل؟

عادل بعصبية:  عايز إيه إنت كمان؟

العامل بضيق:  البنت اللي حضرتك شفتها جت النهاردة

عادل إلتفت بسرعة: وهي فين يا غبي مش بتنطق ليه من ساعتها

العامل: الله يسامحك يا أستاذ

حازم:  ماتزعلش! فين البنت ؟

العامل:  مشيت على طول أنا لمحتها كانت جاية عشان تتفرج وأكيد هاتيجي تاني

عادل:  مش قولت لها ليه وخلتها عندك! أنا مش منبه عليييييك
العامل:  مشيت بسرعة! بس أنا مشيت وراها.. وعرفت هيه شغالة في محل ملابس مكتوب علية توتي..  بس ماعرفش الطريق... أنا رجعت بالعافية, ومش هاعرف أروح تاني ممكن تسأل وتروح!

عادل فرح جدا وطلع من جيبه فلوس وإداها للعامل وقاله ماتزعلش مني

 (وخرج العامل وعادل قال لحازم: يل بسرعة نسأل على المحل ونروح بجد ..هاوريك أجمل ملاك على وش الأرض )

 وفعلا انطلقوا بالعربية وسألوا الناس عن المحل ومرة حد يوصف غلط.. ومرة حد يوصف صح .. لفوا المكان كذا مرة والآخر وصلوا محل صغير أوي

عادل: أووف أخيرا!  يل يا حازم تعالى معايا أوريهالك

 (ونزل حازم وقفل باب العربية ولسه ها يقرب على المحل طلعت حنين تكب جردل الميه كانت بتمسح المحل!

رجع حازم بضهره بسرعة  يتدارى بالعربية!عادل استغرب أوي ويبص لحازم ويبص على البنت اللي دخلت بسرعة ومخدتش بالها منهم

عادل:  هي دي البنت! تعالى عشان تشوفها

حازم:  اركب يا عادل

عادل: في إيه؟

حازم ركب بسرعة: اركب باقولك..ورجعوا على مكان التصوير ودخلوا غرفة المكتب

عادل:  ممكن أعرف في إيه؟ وليه خلتنا نمشي كدا! هي مش عجبتك؟

حازم: البنت دي آخر واحده ممكن تعمل الدور

عادل: ليه بس؟ أنا شايف إنها مناسبة جدا جدا كمان! وأكيد هتوافق!
حازم:  فعلا عندك حق! لكن لو عرفت إني أنا المخرج وإنها هتشتغل معايا مش هتوافق أبدا! حصل تاطش بيني وبينها قبل كدا

عادل بحيرة : إنت عرفتها إمته عشان يحصل تاطش ؟! هو مافيش بنت بتعدي من تحت إيدك (ويتنهد بحقد وكمل) يبقى مش لازم تعرف في البداية

حازم:  إزاى ؟

عادل: المهم إنت موافق عليها ؟ناخدها وندربها وتعمل الدور ولاّ لا؟

حازم:  موافق طبعا!ياريت ترضى!

عادل:  أنا هتصرف

حازم بتوتر:  هتعمل إيه؟(حازم خايف على إحساسها أوي....!خرج عادل ورجع لحنين (وكان عادل واد جامد أوي بس في الشكل حازم أجمل! وكان شيك جدا جدا!)

 قرب من المحل! دخل وقفت حنين وبابتسامتها الرقيقة:  حضرتك عايز حاجة معينة؟
عادل يبص لها (قد إيه البنت رقيقة وجميلة واللي مانعرفوش إن عادل من أول وهلة دق قلبه لحنين!).....................والسر بعيون حنين؟

حنين بخجل:  حضرتك عايز لبس معين؟ يعني كاجول أو.........

عادل:  أنا عايزك إنتِ ؟

حنين بدهشة:  نعم

عادل: سوري ماقصدش حاجة! أنا شفتك بمكان التصوير! أنا عادل   مخرج سينمائي وشايف إن ممكن تشتغلي معانا لو تحبي! إحنا بندور على البطلة ولازم تكون وجه جديد عندك مانع! هو إنتِ اسمك إيه؟

حنين عندها ذهول!معقول دا حقيقة اللي سمعاه دا!  بيعرض عليها حلمها! وتبقى ممثله وتتشهر! شردت حنين..............

عادل:  يا آنسه! إيه.. روحتي فين ؟ ما بترديش ليه؟ هو الدور كويس جدا ومحترم أوي!عندك مانع؟

حنين هزت دماغها يعني لا معندهاش

عادل:  طب ممكن تيجي مكان التصوير بكره الصبح عشان نتكلم في الدور ونعمل تِست صغير
حنين هزت دماغها يعني أه

خرج عادل وعند باب المحل رمقها بنظرة أخيرة مع :  مش هاتقولي اسمك إيه؟

حنين بخجل:  حنين

عادل بابتسامة:  باى حنين! بانتظارك بكره

حنين قعدت ومش مصدقة اللي حصل معقول هاتبقى ممثلة! وياترى جدتها هتوافق ولاّ؟

 (أما عادل ركب عربيتة ومشي وهو فرحان جدا ويكلم نفسه دي بردوا حد يعمل معاها طاتش!طول عمرك غبي يا حازم!)وعدى اليوم

وروحت حنين مش مصدقة اللي حصل وترن جرس الباب, مع إنها معاها المفتاح لكن من الفرحة نسيت وترن وترن ..................

كريمة: طيب طيب! مين

حنين بفرحة: أنا يا نينى

كريمة: طيب (وفتحت الباب ): أمال فين مفتاحك؟

حنين دخلت فرحانة وتلف وتغني وتحضن جدتها (وكريمة مستغربة جدا) خلاص يا كرمله   هابقى نجمه.

كريمة: نجمه! هاتطلعي السما ولاّ إيه؟

حنين: أه ..هاطلع سماء الفن
كريمة: فن! فن إيه إن شاء الله! إنتِ سُخنه؟

حنين: بصي يا كرمله أنا.......(وحكت لها كل اللي حصل

كريمه:  وإنتِ موافقة؟

حنين:  طبعا! ودا سؤال بردوا يا نينى دانا ماصدقت!

كريمه: لا يا حنين.. الموضوع دا تطلعيه من دماغك

حنين بحزن:  نيني إنتِ بتقولي إيه ؟ إنتِ بتتكلمي بجد؟

كريمه: طبعا إنسي الكلام دا! دا وسط مش كويس وإحنا مش قده.

حنين: لازم تثقي فيا.. إن شالله أكون وسط مليون راجل أقدر أحمي نفسي!

كريمه:  أنا عارفه دا كويس! لكن الناس ليها الظاهر ومهما كان بيقى في حاجات مش كويسة!حنين قفلي على الموضوع دا

حنين دخلت غرفتها حزينة جدا بعد مكانت فرحانة جدا

وفي الوقت دا كانت مروة بالكوافير بتغير لون شعرها وتكويه  وتركب لينسيز وخرجت اشترت طقم شيك جدا ودا كله استعداد ليوم الجمعه
؟
؟
ياترى هيحصل فيه ايه ؟

ومروة ناوية على ايه ؟

وياترى حنين خلاص كدا هيضيع حلمها
ولاّ
ولاّ
؟
تابعوني


هناك 29 تعليقًا:

Dr/ walaa salah يقول...

يا سلام يا سوسو انقذتيني والله

قاعده مش عارفه اعمل ايه ولقيتك نزلتي الحلقه برافو عليكي

بس اللي مستغرباله ازاي حنين تستمر مع مروه كصديقه وهى بالاخلاق دي

باين انها نصحتها كتير لازم تبعد عنها دي ممكن تجيبلها مشاكل كتير

اما عادل وحازم وحنين بصراحه الموضوع اتلغبط اوي في مخي

يا ترى مين هيحب مين

انا منتظره الحلقه الجايه يا قمر بفارغ الصبر

قبل ما امشي قصتك رائعه وانتي بتكتبيها باسلوب تنفع مسلسل والله

ما شاء الله عليكي

اسماء عبدالعزيز يقول...

احبائي
اتمنى الجزء دا من الروايه يعجبكم

وياريت تقولوا رايكم ايه ؟
ومتوقعين ايه ؟

والبت مروه ناويه على ايه؟

دمتم بكل الخير

اسماء عبدالعزيز يقول...

ايه النووووووووور دا
بجد نورتي المدونه ياقمر

تسلميلي ياقمرى على متابعتك
وبعدين تعالى هنا
لا اوعى تتلخبطي

الحوار لسه طويييييييييل
ومعايا هتلاقي مفاجآت كتييييييييير
بس يارب تعجبكم
دمت بحب
على فكرة
المدونه بتفضل يتيمه لعند ماتمري عليها ياقمر
كوني بخير دائما

Tears يقول...

صعب ان يكون فيه صديقتين شخصياتهم مختلفة اوى لكن مش مستحيل

اسلوبك جذاب و خسارة يبقى بس هنا لازم تسعى تخلية عمل درامى للتلفزيون


تحياتي لقلمك و عقلك

tote soly يقول...

قصة جميلة وطريقة سرد رائعه
ويارب جدتها توافق انها تشتغل ممثلة وتحقق حلمها .
ياريت تكمليها بسرعه مشتاقة اعرف ايه اللى هيحصل بعد كدا وخصوصا لما تعرف حنين ان حازم المخرج هتعمل إيه
شكراً لكي يا سمسمه

Carmen يقول...

الله ع الاكشن
الموضوع اتعقد جدا وانا كنت هنام منكم:))) وصفك بيحسنني اني بتفرج مش بقرأ
بجد تسلم ايدك منتظرين الحلقه الجاية
تحياتي

وداد يقول...

ايه الحلقة الجميلة دي

اولا ربنا يهدي الزفتة مروة دي لأنها بكد انسانه مش كويسة

والمفروض اول ما حنين تعرف إللي بتعمله تبلغ جوز مروة على طول

وكما تقطع صلتها بيها نهائي

ثانيا بالنسبة لحنين وحلمها اقول اكيد هتحققه بكل الطرق

ممكن على الاقل تقنع جدتها انها تمثل حتى الفيلم ده بس

وانا مستنيه اشوف اللقاء الرائع والمفاجئ لحنين لما تشوف حازم

بإنتظارك يا قمر

غير معرف يقول...

يوم عن يوم بيزيد التشويق
ما شاء الله عليكى
قصه جميله
هستنى الحلقه الجايه
بسررررررررعه
ربنا يهدى اللى اسمها مروة دى
حلقه جميله
تسلم ايديك
تحياتى

أشرف محيي الدين يقول...

الكاتبة المتألقة أسماء

صدقا طريقة تتابع الأحداث في القصة مشوقة وممتعة وتجذب القارىء في كل تدوينة أكثر وأكثر ...

هذه الحلقة رفعت نسبة الغموض لدي كثيرا ... لست أدري ولكنني اشتم رائحة علاقة حب ثلاثية الابعاد تضم الكثير من الصراعات بين شخوصها ...

كل الود

رحاب صالح يقول...

صباحك حلو اووي
برغم اني مخنوقة والله وقفلت الاكونت علي الفيس بوك وقررت اني اتابع مدةونات بس حاليا انقذتيني بجد كنت مخنوقة اووي وبجد طريقة حلوة كتير وانا مع تيرز في حكاية الصداقة دي والاختلاف بينهم وكمان بتمني ان ربنا يوفقك وتتعمل مسلسل او فيلم

Yasmeen يقول...

بوست جميل

وكانت صدمه اللى عملته مروه مصدقتش صعبان عليا امجد ...
والمفروض حنين توعيها للغلط ده وتهددها انها مش هتعرفها تانى لو مشيت فى الطريق ده .. وتبلغ ولدت مروه كمان مش جوزها علشان متخربش بتها ممكن دماغه طاقه علشان محرومه من كلمه الحلوه... الله اعلم يمكن تفوق لنفسها قبل ما تعمل الغلط

بانتظار الحلقه القادمه ..

ʚϊɞ آلاء الْعَسَّاف ʚϊɞ يقول...

السلام عليكم ورحمة الله و بركاته

يا سلام تسلم الانامل كتير كتير حلوة .. و الاحداث بلشت تتأزم .. للأسف أنه هاد واقع و واقع مرير بالنسبة لــ مروة في بنات كتير بحاجة لـ أزواجهم و هما راكظين ورى تحقيق متطلبات الحياة برأي الأنسان يضل وسط عيلته و يعطيهم حنان أحسن من لما يسافر و تبدأ المشاكل النفسية و العاطفية لكل منهم و يا ترى ممكن يكون محمد تزوج في الغربة و لا وفي لزوجته ... و برضوا حلم حنين و شو راح يصير معها بأنتظار الاحداث بكل لهفة و شوق


مودتي ✿

غير معرف يقول...

اسلوبك فى الكتابه شبيه باسلوب واحد اسمه باسم فوزى اسلوبه جميل انا عملت مدونه مخصوصه لنشر مواضيعه وهى هنا يمكن تفيدك

http://noureldens2.maktoobblog.com/

قصصه اسفل كلمات اليوم

لان كلمة اليوم ليست من ضمن القصص

د.هند الفخراني(ساجده لله) يقول...

جميله جدا في انتظار البقيه

اسماء عبدالعزيز يقول...

تيرز الجميلة
اولا اشكرك جدا على المتابعه ياقمر
ثانيا
بالنسبه للأصدقاء .. لاحظي انهم مش اصدقاء وبس هما جيران كمان وغير كدا واجبك نحو الصديق تنصحيه مرة واتنين وتلاته وبعد كدا تبعدي عنه او تفكرى في حل تاني
لكن حنين مش متأكده من اللي مروة بتعمله هي بتشك انها بتكلم لكن مش متأكدة لأن مروةمش بتحكيلها
هي بتشتكى وبس ان جوزها حارمها من الكلام الحلو وبعدين النقطة دي انا وضعتها في روايتي عشان حاجة مهمه اوى
ان الانسان لازم ينتقي الزوجه قبل الزواج .. وكمان لابد ان لا يغيب عنها كثيرا كما اوصانا الرسول الكريم .. كان ينزل الجنود من الحرب ليزوروا اهلهم
وكمان .. في حاجه تانيه لما تكون الزوجه غير ملتزمه دينيا ممكن تعمل ايه
ودا حصل حقيقي
عامتا
مش هنسبق الأحداث لكن
خليكِ معايا ونشوف هتودينا لفين
وفي حكمة بتقول
ان لم تستحي
فافعل ماشئت

كوني بخير حبيبتي

اسماء عبدالعزيز يقول...

توتي سولى الجميلة
وحشتيني ياقمر
انا سعيده جدا انها نالت اعجابك
تفتكرى هتعمل ايه لما تعرف وهى اصلا ممكن تعرف ؟
؟
؟

معلش انتو مضطرين تنظروا الحلقه الجايه شوية لأن لوسي الجميلة
وضعتنى في واجب تدويني
هاروح اعملة وابقى ارجع
وياريت اعرف اكتبه
بصراحه مابعرفش اتكلم عن نفسي
هههههه

كوني بخير حبيبتي

اسماء عبدالعزيز يقول...

كارمن الجميلة
وحشتيي ياقمرى
انا سعيده انها عجبتك
شفتى بأه اديني عملتلك تلفزيون جوه المدونه
لا والجزء الجاى مهم اوى هحاول اعملكوا خلفيه موسيقية تليق بالأحداث
ولولنى خايبه شويه
بس هحاول

كوني بخير حبيبتي
كوني بالجوار دائما

اسماء عبدالعزيز يقول...

وداد الجميلة وحشتيني ياسكر
والله انا عاجبني اوى رد فعلك
هههههههه
شكلك جد اوى
اولا ربنا يهدى
ثانيا ماتنسيش انها هددتها بكدا
ثالثا
في حاجه مهمه
انتو
نسيتوها
واتشغلتو بالحلم

الحلم لو اتحقق
فيه
جزء
غاااااااااااااااامض
ياترى
هيتحقق هو كمان
وياترى هو ايه

كوني بخير ياقمري

اسماء عبدالعزيز يقول...

الحب الجميل
وحشتيني ياقمر
يسلملى زوقك وكلامك الرقيق
الحلقة الجاية اكيد فيها مفاجآت غيرمتوقعة
بس في حاجه هتعطلنا شوية
وهو واجب التدوين
هحاول اكتبه
هههههههههه
وبعدين انزلة

تسلميلي ياقمرى
كوني بخير

اسماء عبدالعزيز يقول...

أخي الكريم الأستاذ\ اشرف محيي
يسعدني متابعتك لهذه الرواية
واشكرك على كلماتك الراقية
بالنسبه للغموض
ممكن تكون علاقة حب ثلاثية الأبعاد زي ماتفضلت وقولت
لكن
ياترى
مين
هيفوز
بقلب
حنين
وياترى
هي ثلاثيه
بس
ولا
في
حد تاني

لاحظوا
ان
الخاطرة اللي بمقدمة الرواية
كتبها
احد ابطالى
ياترى هو موجود دلوقتي
ولا لسه
دورة مجاش
هنشوف
هتاخدنا الروايه لفين
كون بخير أخي الفاضل

اسماء عبدالعزيز يقول...

رحاب الجميلة
سلامتك ياقمرى من الخنقة
حاولى تغيرى جو ..او تعملى اى شيء بتحبية
اتمنى من الله ان يزيل همك ويسعد قلبك

على فكرة
هو مش تشكير في روايتي
لكن
صدقيني معاها
بتقرى شيء من نوع جديد

عشان كدا انا اجلت طباعتها ورقيا
ونزلتها هنا عشانكم
ويارب في النهاية
تعجبكم
كوني بخير وسلام

اسماء عبدالعزيز يقول...

ياسمين الجميلة
منوره هنا يكر
فعلا عندك حق
المفروض الصديق السيء نبعد عنه
بس تفتكرى حنين هتعرف مروة ناويه على ايه
طب وهتسيبها تعمل كدا
طب هيحصل ايه

هنشوف مع بعض الحلقه الجاية
واتمنى انها تعجبكم
كوني بخير حبيبتى

اسماء عبدالعزيز يقول...

ثلاثة انامل الجميلة
وحشتيني ياقمر
تسلميلي على كلامك الرقي
فعلا عندك حق
لازم الانسان يلتفت ليته ومش يتشغل
بالحياة وتوفير الفلوس
لأن تمنها بيبقى غالى اوي
كوني بخير حبيبتي

اسماء عبدالعزيز يقول...

أخي الكريم غير معروف
اهلا بك هنا
انا قريتالمدونه لكن مش شايفه اى تشابه
بين اسلوبي بالكتابه واسلوب باسم فوزى الا فقط في اللغه العامية

ممكن يكون اسلوبه جيد جيد او ممتاز
لكن لا يستحب تشبيه كاتب بآخر
وخاصة أعمالى لأنها اسلوبها خاص بي
ولكل كاتب ما يميزة عن آخر

اعجبت بالمدونه كثيرا واكيد ان شاء الله من المتابعين
دمت بخير

اسماء عبدالعزيز يقول...

اختي الجميلة
الدكتورة هند فخراني
وحشتيني ياقمر وطال الغياب
اتمنى دائما ان قلمي ينال اعجابك
كوني بخير دائما

هبة فاروق يقول...

قصة مشوقة وجميلة وان شاء الله
متبعاكى تقبلى مرورى

اسماء عبدالعزيز يقول...

هبة الجميلة
يسعدني مرورك ياقمري
واتمنى دايما ان قلمي ينال اعجابك
دمت بحب
كوني بخير

شمس النهار يقول...

جملة

اسلوبك جميل وشيق جداااا

مستنيه الباقي

:)

اسماء عبدالعزيز يقول...

شمس النهار الجميلة
يسعدنى دايما مرورك ياقمري فلا تغيبى واخبريني دائما بجديدك يسكر لأننى احب ان اكون بالجوار دائما
كوني بخير حبيبتي