إجمالي مرات مشاهدة الصفحة

السبت، 13 نوفمبر 2010

( 4 ) شـــــوق وحــنـيـــــن..



أحبائي الكـــِــــرام 


أشكركم كثيرا على المتابعه .. وآرائكم الجميلة التى شجعتني على التكملة في عالمكم الجميل البوست المرادي مختلف 
هاتقولوا مختلف ليه ..

اولا احب اعرفكم عن نفسي اكتر 
انا أكتب الروايات باللغة العامية .. وأجد نفسي بها كثيرا 
وكما ذكرت في ملفي انه تم نشر بعضها 
والحمد لله انها لاقت الكثير من القبول لدى القراء
ومنهم رواية 
حينما يدق قلب الأنثى
وهي رواية كبيرة وتمت الموافقة عليها كاقصة مسلسل 
وحين انتهائي من السيناريو 
سيتم عرضها إن شاء الله

والأيدي الباردة .. طلبوا منى الكثير ان اقدمها للسينما
وكذلك المتسول والمتعه
ويصفون كتاباتي أنها  تصلح للسينما 

وقالوا انني مجيدة للعامية 

لن أطيل عليكم 

ولكن هنا أحتاج رأيكم بأمانه

هنا كنت أحول روايتي من العامية الى الفصحى المبسطة والحوار العامي 
كنوع جديد لكتاباتي

 فأنتم الحكم هنا 

سأنزل بوست اليوم بالعامية .. 
لتقوموا بالتعليق والاختيار 

هل اكملها هنا هكذا .. ؟
أم 

نجعلها كما كتبت بالعامية ..أقرب إليكم  

وكل عام وانتم بخير بمناسبة عيد الأضحى المبارك 



 (وقفل حازم  ونزل بسرعة وركب عربيتة, وراح على بيت أخوة! اللي لما عرف إنه جاى قفل ملفاته وقال في نفسه: مافيش فايده مش هعرف أكمل شغلي

 رن جرس الباب وفتحت الشغالة الباب, ودخل حازم وقابل حاتم بالأحضان والسلامات.. ودخلوا غرفة الجلوس وطلب حاتم من زينب الشغالة إتنين قهوة

حازم:  عايز منك خدمة

حاتم:  قوول كدا!  وأنا اللي فاكر إني وحشتك وجاى تشوفني! آخره ... هات ماعندك

(حازم بدأ يحكي لحاتم كل اللي حصل بينه وبين حنين! وكان مايعرفش
اسمها ونهى كلامه ب .......وبعد ماقولتلهم إني أخوك وأنا واثق إنهم مش يعرفوك شخصيا لكن مجرد اسم منصبك رعبهم! مشيت البنت.. لكن أنا عايز أبهدلها وأذلها! مافيش واحدة قدرت تعمل معايا كدا

حاتم بضيق:  خلصت كلامك؟

حازم: أيوه

حاتم:  إزاي تسمح لنفسك تستخدم اسمي ومنصبي عشان تهدد بيه الناس, وتقطع عيش بنت مسكينة! هي دي الرجولة؟ إنت عارف كويس أنا مبحبش كدا
حازم بانفعال:  في إيه يا أبية هو أنا مش أخوك ؟ وبعدين هي تستاهل! قليلة الأدب وكلمتني بوقاحة شديدة .. لازم تتربى!
حاتم بقسوة: إنت اللي لازم تتربى!  فووق بأه (حازم  ينظر ليه بدهشة )
كمل حاتم: إيه؟ .. مستغرب كلامي ليه؟ فعلا انت اللي المفروض تتربي! من  وقت ما ماتوا بابا وماما وأنا بحاول دايما أعوضك عن حرمانك منهم, ومش أخليك ناقصك حاجة .. عودتك بدون ما أقصد على الأنانية وحب الذات! كل طلباتك مُجابة من قبل حتي ماتطلبها! كنت فاكر إني كدا بحافظ عليك وبعوضك عن اليُتم! لكن بالعكس! وكمان من يوم ما اشتغلت شغلتك دي وانت أخدك الغرور أكتر وأكتر! بقيت إنسان سيء جدا ومعندكش قلب! كل حاجه بالنسبالك مالهاش قيمة؛ تدوسها برجليك! مش حرام عليك بنت مسكينة زي دي؟ أكيد بتشتغل عشان تعول أهلها, عملتلك إيه؟
 معملتش غير إنها ردت إهانتك ليها! ولاّ الكبر أخدك لأنها غير باقي البنات اللي لما يشوفوك يترموا تحت رجليك! إنت اللي إبتديت بالوقاحة! وسمحت لنفسك تتحامى بمنصبي لترهيب الناس وتخرب البيوت! اسمع؟؟........
الوظيفة دي اتعملت عشان تحمي مصالح الناس وشؤون الدولة مش للتباهي  وتصفية الحسابات الشخصية! أنا لو منك أخجل من نفسي  وأروح للراجل أخليه  يرجع البنت المسكينة.. اللي ممكن تكون بأمس الحاجة للعمل دا! خـُـسارة يا حازم.. إنت بقيت من سيء لأسوء! تفضل وقتك انتهى عايز أنام

(حازم عنيه بالأرض ومكسوف جدا من رد فعل أخوه الغير متوقع! لكن حازم غلطان لأنه أدرى الناس بأخوة.. وكان لازم يتوقع رد فعلة ..لأنه  إنسان محترم ونزيه جدا! مايحبش الظلم أبدا.. وحنون على كل المحيطين.. وأكتر إنسان يسارع بالصدقات! وعملة شيء ..وحياته كإنسان شيء تاني! تفتكروا في كدا؟ أكيد في!)

ومشي حازم ويفكر في كل اللي قاله حاتم, وروح البيت حزين ولأول مره في حياته يشعر بالذنب!

وأثناء كل دا كانت حنين روحت لجدتها مهمومة حزينة جدا ولما شافتها ..جدتها سألتها: مالك يا حنين زعلانه ليه.. وراجعة بدري من شغلك ليه؟

حنين بحزن: (حكت لجدتها كل اللي حصل ونهت كلامها بتنهيدا):  هو فاكر نفسه إيه؟ هو ولا حاجة! 

كريمة:  معلش ماتزعليش! رب الأرزاق موجود! بس عايزه أقولك حاجة تخليها حلقة فودنك! الراجل حتى لو شحات فهو كل حاجة! الراجل راجل! غني أو مش لاقي ياكل , واجب علينا احترامه! وبعدين اللي بيحترم بيحترم نفسه! مهما الراجل يهين الست مايصحش ترد عليه! إنتِ غلطانة! وبعدين يمكن كان محتاج يكلم حد ضروري! لازم تلتمسي العذر للي قدامك ومش تردي مهما قال! البنت المحترمة بتعمل كدا! يل روحي غيري هدومك وأنا ها جهز الأكل! وربك يعدلها..
غسلت وشها وغيرت وقعدت تاكل مع جدتها ..... وتفتكر ....؟

  تاني يوم من بدري صحيت حنين على جرس الباب وراحت فتحت.... وجدتها من جوه غرفتها بتسألها: مين يا حنين ؟
حنين:  عم فتحي يا نينى
كريمة تخرج من غرفتها وتلف الطرحة البيضاعلى راسها و:  اهلا وسهلا إتفضل (ويدخل عم فتحي  وقعد على الكنبة في الصالة ,وقعدت كريمه ورحبت بيه! )
فتحي:  إزيك يا حاجة عامله إيه ؟
كريمة: الحمد لله
فتحي لحنين: خدي مفتاح المحل وروحي افتحي
حنين: لا ياعم فتحي أنا مش أرضا ليك الضرر
فتحي:  يابنتي الأرزاق بيد الله.. وبعدين دا شكله كان تايه في الحارة,  ومش هيرجع تاني! وحتى لو رجع يعمل اللي يعمله...
حنين: لا يعم فتحي معلش.. أنا مارجعش مكان إتهنت فيه! ياريت ماتزعلش مني
فتحي:  إيه رأيك يا حاجة؟ إنتِ موافقة على الكلام دا؟
كريمة:  لله الأمر من قبل ومن بعد
فتحي: عموما المحل محلك يابنتي لو حبيتي ترجعي في أي وقت! أستأذن أنا (وقام وخرج وقفلت حنين  وراه الباب )
كريمة: ربنا يكرمه راجل طيب! دإنتِ متربية على ايده
حنين:  عارفا .. عشان كدا ها دور على شغل.. واستحالة أرجع عنده أو أسبب له أي مشاكل
كريمة:  ربنا يكرمك يا بنتي! ويرزقك بالشغل الحلال
حنين:  قوليلي يا كرمله أمي كانت بتحب أبويا؟
كريمه تبتسم:  وإيه مناسبة الكلام دا يابنت راوية؟
حنين بدلع:  والنبي إحكيلي يا كرمله!عايزة أعرف

كريمه تتنهد:  أبوكِ كان ابن ناس أوي, وكان صاحب واحد جارنا, وكان بيجي كتير عشان يشوف أمك! كانت أجمل بنات الحارة وكل الشباب يتمنوها! لحد ماشغلها بيه وحبته! وتقدم عشان يخطبها وقامت قيامة أهلة ومرضيوش أبدا! لكنه سابهم وسكن هنا في الحارة, ورضي إنه يشتغل شغل بسيط وعاشوا مبسوطين!ولكن ؟ أبوه الله يسامحة, فضل وراه لحد ما خلاه يسيبها ويروح يعيش معاهم! وكانت حامل فيكِ.. في الشهر السابع! وحزنت على بعده أوي وكانت كل يوم تبكي!وهو كان كل فترة يجي الحارة وإحنا نايمين ويحط ظرف تحت الباب فيه فلوس كتيرة عشان أمك! وكانت تزعل أوي وتنهار وتقول أنا عايزاه هو.. مش عايزة فلوس! ويوم ولادتك الصبح ساب لها مع الفلوس ورقه! وكان كاتب فيها؟

حبيبتي راوية:
لازم تعرفي إني عمري ماحب حد غيرك!  إنتِ عمري كله ومصيرنا نتلاقى من تاني!
 أنا قولت خليني بعيد وأوهم أهلي إني بسمع كلامهم عشان ياحبيبتي  أجيبلك فلوس كتير! لأني بهدلتك أوي معايا!
 إنتِ اللي زيك لازم تعيش هانم! سامحيني إني مش جنبك وإنتِ بأمس الحاجة لوجودي!
بس لازم تعرفي إنهم هددوني بقتلك لو مش بعدت عنك! وانا مكنتش باجي بالليل عشان أسيبلك الفلوس وبس ......لا يا حياتي أنا كنت باجي باستمرار عشان احس إني جنبك وأتنفس الهوا اللي بتتنفسي منه..أشعر بوجودك بنبضي.. تعرفي .. باتمنى من ربنا يرزقنا ببنوته... وتكون جميلة زيك.. ونسميها حنين  يا راوية! تعرفي ليه ؟
 لأنها ثمرة حبنا وإمتداد لحنين بين قلوبنا عمره ما ينتهي أبدا!
 حنين يدوم بعيون حنين!
 بـحبــــــــــــــــــ رشــــــد ي ــــــــــــــــــــــــــــــك
       
(وتتنهد كريمة بحزن وتكمل):  وكانت الورقة في ايد  أمك بتقراها ودموعها تنزل, ورمت أمك الفلوس في الأرض وحضنت الورقة وقعدت في الأرض وتصرخ وحاسة انها مقهورة.. وأنا أهديها لكنها تصرخ أكتر وأنا مش عارفه أعمل إيه ؟ ولاقتها بتقولي: أنا تعبانه يامة.. أنا بولد! وبسرعة جبت الحكيمة! وولدتك يأحلى البنات! ولما عرفت إنك بنت قالت حنين! ورحت أنا كتبتك حنين! ولما فاقت من التعب ومر وقت بعد ولادتك ,

 في يوم قالتلي: أنا هاروح أجيبه وزي ماتيجي! العيشة وحشة أوي يامة من غيره! وسابتك معايا قالت عشان أقوله يجي يشوف حنين... هاروح استناه عند بوابة الفيلا بتاعتهم وأكلمه وهو رايح شغله الصبح!( وكان بيشتغل في شركة أبوه).............؟

راوية واقفة جنب شجرة قدام البوابة و شافته خارج)نادت عليه:  رشدي

؟
؟
؟
تابعوني



هناك 43 تعليقًا:

اسماء عبدالعزيز يقول...

ياريت الجزء دا يعجبكم
وياريت تقولولى انهى اسلوب حستوه اكتر وحابين نكمل بيه مع بعض
هاستأذنكوا البوست الجاى هيتأخر لحين عودتي ان شاء الله ن الحج
ارجو ان تدعوا لي بالقبول
وسأدعو لكم بالغيب ان يعطيطم الله ماتتمنوا
دمتم بكل الحب
وكل عام وأنتم جميا وأمة الاسلام بخير حااااااااااااااااااااال

Dr/ walaa salah يقول...

حبيبة قلبي قبل ما تمشي وتحضري نفسك للسفر متنسيش تدعيلي بحسن الخاتمه هناك الله يكرمك


نرجع بقى للقصه

اولا انا هقولك رايي انا

انا من الناس اللي بتحب تقرأ قصص سواء باللغه العاميه او الفصحى

لكن انا شايفه ان اللغه العاميه بتوصل للناس اكتر لانهم بيحسوا ان القصه منهم

مش مجرد مسلسل تركي مدبلج

لانهم هيلاقوا جمل كتيره اوي ممكن يكونوا بيقولوها في حياتهم الطبيعيه

عشان كده هيحسوا بيها اكتر

القصه جميله اوي يا اسماء كده

عجبني اوي جواب رشدي

بصي من الاخر يا سوسو كمليلي القصه كده يا حبيبتي

بجد انا حبيتها اوي

تصدقي انا نسيت نفسي وقعدت ارغي اوي

يلا تروحي وترجعي بالسلامه يارب

رحاب صالح يقول...

ترجعي بالسلامة ان شاء الله
بس الصراحة اللي فات احسن
في الاسلوب واللغة
يعني العامية دي مش حلوة لكتن الوصف لما يكون الفصحي والكلام مخلوط نوعا ما بالعامية هتكوني كدة ضربت عصفورين بحجر واحد العامية والفصحي ...ده من وجهه نظر ناس كتير لاني كنت باخد رأيهم في الموضوع ده عشان القصص اللي بكتبها وانا كتبت بالعامية والفصحي وممكن تراجعي مدونتي وتشوفي فيها القصص ...تحياتي

بوسي يقول...

جمييييييييييلة جدا يا سمسمة
ترجعلنا بالسلامة وعلى فكرة جبتلك العبايات

غير معرف يقول...

حج مقبول وذنب مغفور إن شاء الله .
لا تنسيني من صالحك دعاءك بالله عليك .

بالنسبة للقصة ، فالقرار لكِ وحدك ،
لأن الكاتب لا يستطيع أن يقدم مايرضى كل الأذواق في عمل واحد ، فكل قارئ له مايفضله .

ولكن ارجعي لنفسك أولا في هذا القرار بعد معرفة ومقارنة النتائج الأكثر إيجابية التى قد تترتب على قرارك .
فالعامية انتشارها سريع ولكن محدود في حيز معين ، أما الفصحى انتشارها اوسع ولا يتحدد بحيز معين بل ينتشر في ارجاء العالم بالترجمة إلى اللغات الأجنبية وبذلك يصل للعالمية .

احكمى على أسلوبك الذى تفضليه فهل سيحقق لكِ نتائج إيجابية أكثر ، سواء القبول لدى الناس أو الانتشار وغيره .

ولكن لابد أن تكوني مقتنعة تمام الرضا بقرارك حتي تستطيعى الدفاع عنه أمام أى نقد .

وأحب أن أقول لكِ أنكِ رائعة في كل الأحوال ، فأنا قرأت لكِ القصة القصيرة كانت كلها لغة فصحى ، وقرأت لكِ رواية عامية ، وقرأت لكِ المزيج بين الإثنين ، وفي كل حال أنتِ رائعة .

ولما لا طالما أنتِ تجيدين هذه الأساليب الثلاثة أن تكون أعمالك منوعة ، وإذا كان العمل الواحد ذات الصبغة المعينة لا يرضي جميع الأذواق ، فإن إمتلاكك لزمام الأساليب الثلاثة يجعلك تتنوعين في أعمالك فترضى جميع الأذواق ، ولكن الذى يجب إرضاؤه في المقام الأول هو ذاتك .

فضعي هذا في الإعتبار .

أما هذا الاستفتاء الذى فعلتيه قد يزيد من حيرتك ، لأن الجميع لن يجتمع على رآي واحد ، فيمكنني أن أقول رآى الذى هو تفضيل الفصحي البسيطة ، ولكني ارى في رآي هذا تحجيم لذاتك أنت ، فالكاتب يكتب مايؤمن به بالطريقة التى يفضلها هو أولا ويرى فيها نفسه ، عبر أسلوب بسيط يصل إلى الناس .

تقبلي خالص إخلاصى وإحترامي .

الاء عثمان
بنت مصر .

غير معرف يقول...

حج مغفور وذنب مغفور ان شاء الله
ربنا يتقبل
كل سنه وانتى طيبه
اسلوب التشويق بيزيد حلقه عن حلقه
وعجبنى جدا رد فعل اخو حازم
ورد فعل صاحب المحل
مستنيه المزيد
تحياتى

rovy يقول...

كل عام و انتى بكل الخير يا رب و أسرتك الكريمه و كل أحبابك .. أسعدكى الرحمن ..
لى عودة إن شاء الرحمن لقراءة قصتك وفقك الله ..

شمس النهار يقول...

ماشاء الله عليكي يااسماء

اسلوبك جميل ومشوق جدا

طريقتك جميلة

بس اسمحي لي ليه مش بتوصفي الاشخاص
في سياق الكلام يعني

ربنا يكرمك
وان شاء الله حج مبرور وذنب مغفور

ترجعي بالف سلامه

:))

همسات وبحــ الحياه ــر يقول...

سمسمة حبيييييبتى
بحبببببببك جدا ومفتقداكى اوووى
اسلوبك فى العامى طبعا احلى بكتييييييير
دايما متألقه بأعمالك
اوعى تنسينى من دعائك
يارب ترجعى بألف سلامة
ربنا يسعد ايامك

غير معرف يقول...

السلام عليكم ورحمة الله وبركاته
وكل عام وأنت بخير وإلى الله أقرب
عيد أضحى مبارك

Dr/ walaa salah يقول...

جينا نهني بالعيد ونقول :

الله يتقبل اعمالك ومبارك عليك العيد
و يعود عليك بصحه وسعاده وعمر مديد

محطات ثقافية يقول...

جميلة وفيها حبكة روائية
سعيدة بالتواجد في مدونتك لأول مرة أختي
وكل عام وانت بالف خير

وداد يقول...

كل سنة وانتي طيبة يا سمسمه

وربنا يتقبل منك يارب

تروحي وترجعي بالسلامة

انا عجبني طريقة كتابتك للبوست ده

كلام مفهوم وكلنا بنقولوا

الجزء دا بقى جميل جدا

لسببين

الاول : انه على اسم مدونتي ( شوق وحنين )

الثاني : رومانسي جدا وعجبني موقف حاتم اخو حازم

وموقف رشدي

بجد الناس إللي زي دي قليلة الزمن ده

متابعة معاكِ ان شاء الله

وترجعي بالسلامة

الموسوعة الحرة يقول...

عيد سعيد مبارك...
نبارك لكم حلول عيد الاضحى المبارك لعام 1431ه-2010
اعاده الله سبحانه وتعالى عليكم بالخير والبركة والرحمة والغفران...
تقبل الله اعمالكم وغفر ذنوبكم ورحم موتاكم وعفى عن تقصيركم
ودفع عنكم كل مكروه ...
نسأله تعالى ان يعم برحمته الامن والرحمة والبركة والسلام
على البشرية جمعاء...
انه سميع مجيب الدعاء...
اهديكم عطر الورد وألوانه...
وارسل جواب انتم عنوانه...
اهنيكم بمقدم العيد وايامه...

دمتي بخير...

toota يقول...

لي عوده
ولكن لا تتركينا مره اخرى في شوق لأحداث روايتك .

بليييييييييييييييز
سرد سلسل ومشوق

اسماء عبدالعزيز يقول...

دكتورة ولاء الجميلة
كل عام وانت بخير حال وعيد سعيد
انا والله دعيت ليكِ ربنا يتقبل ياقلبي
اما بالنسبه للبوست انه عجبك
فأنا سعيدة جدا انه نال اعجابك وفعلا بحس انه اللغه العاميه اقرب للشباب
وسبب اننى نزلته كده لأنه في الموقع التاني اللي قرا لى بالعاميه طلبوا بشده انزل الباقي عامي
وان شاء الله نكملها كدت
تسلميلي ياقمرى وشكرا على التهنئه بالعيد
دمت بحب وود

اسماء عبدالعزيز يقول...

حبيبتي الرقيقه / رحاب صلاح
كل سنه وانت طيبه يسكر
عندك حق ان الفصحي اكيد اجمل وابلغ لكن لما نزلتها بالاسلوب اللى فات ( فصحى وعامي ) قالوا انها بتعمل لدى القارء عدم اتزان

على فكرة اسلوبك جميل وراق
لكن بالنسبالى الروايه دي اصلا انا كتباها عامية .. فاهنزل باقيها عامي لأنها لما تحوليها بعد كتابتها بتفقد لدى الكاتب رونقها
وهناك اعمال اخرى ستجديها فصحى مطلقة وهى ايضا نالت القبول لدى الكثير
دمت بحب

اسماء عبدالعزيز يقول...

بوسي الجميلة
تسلميلي ياقمرى على مرورك وهروح بسرعه اتفرج على العبايات
كل سنه وانت طيبه ياقمرى

اسماء عبدالعزيز يقول...

حبية قلبي وصديقتي الرقيقة الأديبة / آلاء عثمان
اولا كل سنه ةانت طيبه ياقمرى
انا دعيت ليك اكيد يسكر وعمرى ما انساكِ ياقمري وربنا يتقبل يارب
بالنسبه للاستفتاء
لأني في مجلة الابتسامه انتِ عارفه اني لى قرائي هناك ..فطلبوا منى العاميه لا رجعه
ههههههههه
حابينها كدا

فكنت لازم اسألهم هنا كمان وآخد رأيهم

انا عارفا ان الفصحى اقوى وانت قريتي لي بالفصحى وعجبتك لكن لما تكتبي شيء بالعامي وتحوليه للفصحى بينتابك القلق
لأنك ببساطة مش كتبتيه كدا من الاول
فهمتى الحيرة ليه .بس مش اكتر
لكن هل ستخبركِ يدى كتبتها فصحى وانا حاباها كدا ونزلتها كدا ومش معني ان بالعامي افضل بالنسبه للبعض فدا هيكون طابع كتاباتي لا ..لكن زى مانتِ قولتي ياقمرى هنوع كتاباتتي ,,لأن لكل رواية عندى مود مختلف مقتنعه بيه وبأسلوبه ..وان شاء الله الجديد هيكون افضل
بس بجد اكتر شيء بيسعدنى هو تواجدك دايما ياقمرى
ماتعرفيش بجد انا سعيدة بصداقتك قد ايه

كوني بخير ياعمري

اسماء عبدالعزيز يقول...

حبيبتي الجميلة الحب الجميل

شكرا ياقلبي على احساسك الطيب وربي يكرمك ..
وكل عام وانتِ وبألف خير
انا سعيده اوى ان الروايه عجباكِ لحد كدا ربنا يستر على الباقي
كوني بالجوار دائما وكوني بخير حال

اسماء عبدالعزيز يقول...

روفي الجميلة
اسعدنى مرورك المميز
اتمنى من الله ان تنالى خير ماتتمنى
انتظر عودتك ورأيك بروايتي
دمت بخير

اسماء عبدالعزيز يقول...

شمس النهار الجميلة المميزة
تسلميلي ياقمرى على مرورك الراقي وكلماتك الرقيقة
بالنصبه للوصف ياعمري في الرواية بيكون في اضيق الحدود وخاص بالأبطال الرئيسيين بالعمل ..اى الوصف الاكبر من حظهم .. لكن يسكر حاضر هحاول اوصفلك اكتر ياقمر
كوني بخير دتاائما

اسماء عبدالعزيز يقول...

الصحفية الجميلة توته
0همسات وبحر الحياه)
ازيك ياقمرى وحشتيني كتييييييير جدا
كل سنه وانت طيبه
كوني بخير ياقلبي

اسماء عبدالعزيز يقول...

مدونة الأمل
يسعدني كثيرا مرورك الكريم وكلامك الراقى
كل عام وانت بكامل الصحة والعافية
كوني بخير وبالجوار

اسماء عبدالعزيز يقول...

حلم الجميلة
اسعدني مرورك كثيرا وكل عام وانت بخير حال
ارجو ان ينال قلمى اعجابك
كوني بخير

اسماء عبدالعزيز يقول...

وداد الجميلة
وحشتيني ياقمر
كل سنه وانت طيبه
انا سعيده جدا ان البوست دا عجبك جدا
واتمنى ان الباقي ينال اعجابك
دمت بحب

اسماء عبدالعزيز يقول...

اوبن بووك
اشكرك كثيرا على مرورك الكريم وعلى التهنئة التى لك مثلها واكثر
واعاده الله عليك بالخير واليمن والبركات
كل عام وانت بخير
اتمنى المشاركه بالرواية وان تنال اعجابكم
دمت بخير

اسماء عبدالعزيز يقول...

تووتا الجميلة
يسعدني مرورك ياقمر
كل سنه وانت طيبة
ارجو ان تظلين بالجوار وان تنال اعجابك يسكر
كوني بخير

توتا يقول...

حبى
انا عارفه انها طويلة وفاكره كلامك كويس
بس خليها براحتها انا اصلا مستنية اما اخلصها وهغير فيها كتيييييير انا كل يوم بفكر فيها لغاية مابحلم بيها هههههههه

بس علفكرة انا خلاص قربت ابدأ فى الاحداث اللى هتوصلنا للنهاية
انا مستنية بس لاجازة نص السنة وهظبطها كتييييير

Carmen يقول...

بسم الله ما شاء الله اسلوبك فعلا رائع قصة جميلة جدا وفعلا تصلح للسينما
ربنا يوفقك يارب
اسمحيلي ابقي من زوارك
تحياتي

toota يقول...

اول شي ياقمر انتي كتير زووووووء
بعدين مافيني ابكي وتغرق صفتك مادخلني
بدك تستعجلي عالروايه
بعدين اسويلك قصه ههههههههههههه
انا لزقه مابتعرفيني ^_^

والله يوفقك بجد اسلوبك ممتع وقصتك حلوه ومبين عليها رومنسيه ورقيقه بس حزينه +_+

تحياتي الك

اسماء عبدالعزيز يقول...

حبيبة قلبي توتا

هي فعلا جميلة .. وفعلا لو ظبطيها اكتر هتكون اجمل وحاولى تخليها مكتوبه عندك مش تضيعيها كالعادة
انا منتظره باقي الاحداث ياقمر
كوني بخير وحب

اسماء عبدالعزيز يقول...

كارمن الجميلة
كل عام وانتِ بخير
يسعدني كثيرا ان تكوني من زوار مدونتي
واتمنى ان ينال قلمي اعجابك يسكر
كوني بخير دائما
دمتِ بحب

اسماء عبدالعزيز يقول...

حبيبة قلبي تووتا
دا شرف لمدونتي ياقمرى انك تكوني فيها باستمرار
وانت كمان ياقلبي كلك زوق واتمنى ان تنال اعجابك للنهاية
وجودك هنا يسعدني كثيرا
وسأنزل الجزء الجديد بسرعة كرمان ليكِ ياقمري
كوني بالجوار
دمت بكل الحب

كلمات من نور يقول...

أسماء

ترجعي بالسلامة وحج مبرور إن شاء الله

على فكرة أنا بكتب قصص برضه وبامزج بين الفصحى والعامية وناس كتير بتعجبهم بس منتدى الإسلام اليوم مثلا بيفضلوا يقولولي عدليها وخليها بلغتنا العربية الأم بس بصراحه بتعجبني كده ...ياريت تقري وتتابعيني على مدونتي القصصية

http://qssassy.blogspot.com

أشرف محيي الدين يقول...

الكاتبة المتألقة أسماء

أعتذر وبشدة عن تعليقي المتأخر على الرغم من أني قد قرأت هذه التدوينة أكثر من مرة واسمحي لي في البداية أن أبارك لك في الحجة وبالعودة سالمة إلى ديارك...بخصوص موضوع الكتابة بالفصحى أو العاميه فأعتقد أن الخيار في ذلك يعتمد على هوى قلمك وارتياحه عند الكتابه ومن وجهة نظري فاللهجة المصرية مفهومة في كافة الوطن العربي وهي الأكثر شعبية بين جميع اللهجات العامية .

بالنسبة لي أعجبني طريقة كتابتك بالفصحى والعاميه ... أنت حقا موهوبه

كل الود

اسماء عبدالعزيز يقول...

كلمات من نور الجميلة
كل عام وانت بخير حال
انا فعلا قريت قصة عندك وعجبني اسلوبك جدا
على فكرة
سأظل بامر الله بالجوار
كوني بخير

اسماء عبدالعزيز يقول...

الأستاذ الفاضل \ اشرف محيي
اولا اشكرك كثيرا على التهنئة .. واسأل الله ان ينالها كل من تمناها ..
وكل عام وانت بخير

بالنسبة لاسلوب الكتابه فمعك حق قفالكاتب كما يهوى قلمه وللأسف قلمي تستهوية العامية بشدة ..لأني ارى انها الاقرب ..
ولكن ليس معنى هذا انه لا يفضل طرق الكتابه الاخرى ..
بالعكس لي ايضا بالفصحى وسانزلها عن قريب وسأقوم بالتنوع من اجل ارضاء جميع الأزواق .. وكي اكون راضيه عما يخطه قلمي ..

اشكرك كثيراعلى المتابعه
دمت بخير

شَــــذَا رُوْحٍــــــيُ يقول...

بسم الله ماشاء الله

ربي يحرصك يا اسماء

بجد فوق الرائع ماقراتة هنا

يسلم قلبك وقلمك

مزيد من التالق

✿ ثلاثـہ أنامل وقلم ✿ يقول...

السلام عليكم ورحمة الله و بركاته

المفروض أني ارجع لــ اول بوست و ابلش قراءه لأني حاسة نفسي بقرأ الرواية بالعكس (^_^) ,, غاليتي اسلوبك جدّاً رائع و انا بحب اللهجة المصرية قوووووووي ,, لحظة الرسالة مؤلمة جداً ,,
مودتي و سأنتقل لـت البوست الأول


اسماء عبدالعزيز يقول...

شذى روحي الجميلة
مرورك اضفى لمدونتى طابع خاص
اشكرك على المرور وكلامك الراقي الذي ينم عن طيب قلبك ورقة احساسك
اتمنى ان تكوني بالجوار دائما
كوني بخير حبيبتي

اسماء عبدالعزيز يقول...

ثلاثة انامل الرقيقة
يسلملي مرورك ياعمري .. ويسلم زوقك
انا بانتظارك يقلبي
خلصي براحتك وقولى رايك
وياريت تقولي في البوست الاول هل حازم هو بطل روايتي ولاّ ولاّ
كوني بخير حبيبتي

الفقيرة إلى الله أم البنات يقول...

سعيده انى عدت للقصه لانى فى زحمة الحياة انشغلت متابع لك وعاجبنى اسلوبك انا كنت كتبت سلسه الزوجه المطحونه بالفصحى وبعيدن لقيتنى بحبها بالعاميه فوالله فكرتينى عاوزة اروح اخليها كلها عاميه
متابعك ومش هانسى خالص اكمل قصتك ومنشوف اخرت سى حازم ده ايه